2017 јылда сыгын айдыҥ 28-чи кӱнинде Алтай Республиканын ӱредӱ ишчилериниҥ билгирин бийиктедер ле такып профессионал ӱредӱ берер Институт РСФСР-дыҥ школдорыныҥ нерелӱ ӱредӱчизи, ӱредӱниҥ ветераны Мария Алексеевна Барантаеваныҥ 90 јажына учурлалган  «Родной язык в современном образовательном пространстве: теоретические и методические аспекты» деген талалар ортозында билим-практикалык конференция ӧткӱрди.

Конференцияда алтай тилдиҥ ӧзӱми, школдо тӧрӧл тилди ӱредери ле «Алтай тил», «Литературалык кычырыш», «Алтай литература» деп ӱредӱ-методикалык   комплекстер аайынча сурактар кӧрӱлди.

Турушкандардыҥ ла айылчылардыҥ тоозы 140 кижиге јуук болды. Олор ортодо Москвада «Просвещение» издательствоныҥ  баш редакторыныҥ ордынчызы Ольга  Сергеевна Ноженкина, «Русское слово» издательствоноҥ Марина Ивановна Лобзина, Хакассиянаҥ педагогика билимдердиҥ  кандидады Мария Сергеевна Арчимаева болды.

Конференцияныҥ пленар бӧлӱгинде 4 доклад кычырылган, секцияларда  30 јетирӱ угулган, оноҥ башка 6 мастер-класс кӧрӱлген. Онлайн бӱдӱмле ӧткӱрилген јуунда школдо ӱренчиктердиҥ этнокультуралык компетентностин таскадаары аайынча сурактар кӧдӱрилген. Мында ӱредӱ ишчилердиҥ  билгирин бийиктедер ле такып профессионал ӱредӱ берер Хакасс, Кузбасс, Тува ла Чувашия институттардыҥ ишчилери эрчимдӱ турушты.

Билим-практикалык јуун  јарлу ӱредӱчи Мария Алексеевна Барантаевага учурлалганыла аҥыланып, јаан учур алынды. Мария Алексеевна Алтай Республиканыҥ «Таҥ Чолмон» орденин тагынган, алтай тилле баштамы класстарга керектӱ программалардыҥ, ӱренер бичиктердиҥ, ӱредӱ-методикалык пособиелердиҥ авторы. Ол 1968-1983 јылдарда Горно-Алтайсктагы ӱредӱчилердиҥ билгирин бийиктедер институттыҥ  јааныныҥ ордынчызы ла директоры болуп иштеген. Мария Алексеевна бӱгӱнги де кӱнде институтла ӧмӧ-јӧмӧ иштейт.

М. В. Чевалковтыҥ адыла адалган библиотеканыҥ ишчилери  М. А. Барантаеваныҥ бичиктери аайынча белетеген кӧрӱ-выставка толо ло солун болды.

Туружаачылар Мария Алексеевнаны толгон јажыла изӱ уткып, акту јӱрегинеҥ бек су-кадык, ырыс, сӱӱнчи кӱӱнзедилер.