2019 jылдыҥ сыгын айыныҥ 19 кÿнинде Алтай Республиканыҥ ÿредÿ ле билим министерствозы ла Ӱредÿчилердиҥ билгирин бийиктедер институт «Тöрöл тил эмдиги öйдö ÿредÿликте: теория ла методика  айалгазы» деп Талалар ортодо билим-практикалык конференция öткÿрди. Конференция Россияда  öс калыктардыҥ тилдериниҥ jылына учурлалган.

Конференцияда 150-неҥ кöп улус, ол тоодо эл-тергеелик ÿредÿлик ле аймактарда ÿредÿликтиҥ органдарыныҥ ишчилери, ÿредÿлик тöзомöлдöрдиҥ ÿредÿчилери ле jондык ишчилер эрчимдÿ турушты.

Пленарный заседаниеде  докладтарды ÿредÿ ле билим министриниҥ Баштапкы ордынчызы О.Б. Болтошева, Ӱредÿчилердиҥ билгирин бийиктедер институтта алтай тилди ле литератураны ÿредериниҥ методиказыныҥ кафедразыныҥ jааны Ж.И. Амырова, С.С. Суразаковтыҥ адыла адалган Билим-шиҥжÿ институттыҥ  баш ишчизи А. Э. Чумакаев,  Сугаштыҥ орто текши ÿредÿлÿ школыныҥ алтай тилдиҥ ле литератураныҥ ÿредÿчизи М.А. Самаева эттилер. Тöрöл   тилдиҥ öзÿми, оны школдо ÿредери аайынча jолду, тузалу, ичкери кöрÿмдÿ шÿÿлтелер айдылды.

Анайда ок солун, jилбилÿ мастер-класстарда, секциялардыҥ   ижинде ÿредÿчилер ишти канайда тöзööри, улалтары аайынча ченемелиле ÿлежип, эрчимдÿ иштедилер. Конференция öйинде онлайн-секцияда Хакасияда ÿредÿчилердиҥ билгирин бийиктедер институт, Кузбасста ÿредÿчилердиҥ билгирин бийиктедер институт, Агинскте Забайкальский крайда албаты-jондык ишчилердиҥ билгирин бийиктедер институт турушкан.

«Тöрöл тилди ÿредеринде эмдиги öйдö курч сурактар» деп тегерик столды О. Б. Болтошева башкарып öткÿрди. Ачык эрмек-куучында А.Г. Туянина, Л.В. Емелянова, С.А. Тюлентина, М.А. Бибиева, А.А. Тундинова, А.В. Уванчикова ла оноҥ до öскö ÿредÿчилер тöрöл тилди ÿредериниҥ, турулталарга jедериниҥ, ÿредÿниҥ чыҥдыйын бийиктедериниҥ сурактарын шÿÿштилер.  Школго jÿргелек балдарды тöрöл тилине ÿредерине, баштамы класстарда учурын оҥдоп кычырарына темиктирерине, алтай литератураны школдо ÿредерине учурлалган секциялардыҥ ижи турулталарлу, тузалу болды. Анайда ок, «Орус тöрöл тили калыгыныҥ чÿм-jаҥдарына, jаҥжыгуларына темиктирериниҥ тöзöгöзи» деп секцияда Барнаул каланыҥ 123 таҥмалу гимназияныҥ директорыныҥ ордынчызы Т.Н. Богданова, Горно-Алтайскта  педагогический колледжте  орус бöлÿктиҥ jааны Н.В. Хорун, Горно-Алтайскта эл-тергеелик университеттиҥ преподавательдери С.И. Драчева, Н.А. Волкова , М.И. Чевалковтыҥ адыла адалган эл библиотеканыҥ методисти Т.П. Шастина, республиканыҥ школдорыныҥ орус тил ле литературала ÿредÿчилери турушты.           

Межрегиональная научно-практическая конференция «Родной язык в современном образовательном пространстве: теоретические и методические аспекты», посвященная Международному году языков коренных народов в России