Ӱредӱчилердиҥ билгирин бийиктедер ле такып профессионал ӱредӱ берер институтта ӱлӱрген айдыҥ 18-чи кӱнинде ӱредӱчилерге ле ада-энелерге учурлалган алтай тилди ӱренериниҥ сурактары аайынча «Тӧрӧл тил – калыктыҥ ич байлыгыныҥ тӧзӧлгӧзи» (Самая большая ценность народа – его язык) деп консультационный площадка ӧтти. Площадкада ӱредӱчилер ле ада-энелер эмдиги ӧйдиҥ ӱренчиктерин тӧрӧл тилине ӱредерине јилбиркедериниҥ ченемелиле ӱлежип, ӧмӧ-јӧмӧ аайына чыгар бир канча сурактарды шӱӱшкен.
Јуунда одустаҥ артык ада-энелер ле ӱредӱчилер турушты. Ӱредӱчилердиҥ билгирин бийиктедер ле такып профессионал ӱредӱ берер институттыҥ билим иш аайынча проректоры Иркитова Айжан Акчабаевна уткуул сӧстӱ баштанып, тӧрӧл тилди ӱренериниҥ курч сурактарына ајару этти. Институттыҥ алтай тилди ле литератураны ӱредер методиканыҥ кафедразыныҥ јааны Амырова Жанна Иостыновна Алтай Республиканыҥ ӱредӱлик организациялары алтай тил ле литератураныҥ УМК-ларыла јеткилделгени аайынча куучындап, эмдиги ӧйдиҥ некелтелериле тургузылган бичиктерле канайда иштеери керегинде айтты.
Јуунныҥ ижинде Иташев Аржан Валерьевич, «Оносский клуб – Оностогы кӱрее» фондтыҥ башкараачызы, Алтай Республиканыҥ Эл-Курултайыныҥ депутады эрчимдӱ турушты. Ол балдар тӧрӧл тилин баштапкы ла класстаҥ ӱренип баштаарыныҥ сурактарыныҥ аайына чыгарын ӧмӧ-јӧмӧ шӱӱжерине кычырды. Оогош болчомдорго кычырарга электрон ресурстарды, Интернеттиҥ эп-аргаларын, анчадала «Азатпай» сайттыҥ, эп-аргаларын элбеде тузаланарын темдектеди.
Кордоева Алевтина Николаевна, Баина Лариса Николаевна, Тадыкина Ольга Алексеевна ада-энелердиҥ алдынаҥ сӧс айдып, бала тӧрӧл тилин ӱренеринде билениҥ камааны, тӧрӧл тили кажы ла кижиниҥ јӱрӱминде јаан учурлузы, баланыҥ јайалтазы ачыларында тӧрӧл тилдиҥ учуры керегинде шӱӱлтелериле ӱлежип, билелериниҥ ченемелине тайанып, јилбилӱ ле тузалу јетирӱлер этти. Јуулган улус олордыҥ шӱӱлтезиле јӧп болгонын айдышты.
Алтай тилдиҥ кӱнине учурлай ада-энелер ле ӱредӱчилер кыска диктант бичип, балдарга канайда болужары керегинде санаа-кӱӱнин айдышты.
Ӱредӱчилер ле ада-энелер бойыныҥ ченемелиле ӱлежип, ачык эрмек-куучында ӱредӱ бичиктердиҥ электрон бӱдӱмдерин элбеде тузаланар, алтай тилдиҥ бичиктери керегинде радио, телевидение, газеттер ажыра улуска элбеде јетирер, ада-энелер ле ӱредӱчилер бирлик иштеерин темдектедилер.