«Алтай Республиканыҥ алтай тил ле литератураныҥ ӱредӱчизи – 2020» деп республикан конкурс ӧтти

Тулаан айдыҥ 10-14 кӱндеринде Шебалин аймактыҥ Шыргайты јуртыныҥ орто ӱредӱлӱ школында «Алтай тил ле литератураныҥ ӱредӱчизи - 2020» деп республикан кӧрӱ-маргаан ӧтти. Конкурста туружар кӱӱнин jети ӱредӱчи угускан: Аратина Сынару Васильевна, Сугаштыҥ орто ÿредÿлÿ школыныҥ баштамы класстардыҥ ӱредӱчизи; Мендешева Уажнай Ивановна, Ийинниҥ орто ӱредӱлӱ школыныҥ алтай тил ле литератураныҥ ӱредӱчизи; Самтакова Айна Вячеславовна, Теленит-Сортогой jурттыҥ орто ÿредÿлÿ школыныҥ баштамы класстардыҥ ӱредӱчизи; Тагызова Рената Александровна, Тулойдыҥ текши ÿредÿлÿ школыныҥ алтай тил ле литератураныҥ ӱредӱчизи; Теркишева Айсура Кимовна, Кырлык jурттыҥ орто ÿредÿлу школыныҥ баштамы класстардыҥ ÿредÿчизи; Тунтешева Олеся Николаевна, Беш-Öзöк jурттыҥ орто ÿредÿлÿ школында болчомдордыҥ «Солоҥы» турачагыныҥ таскадаачызы; Феоктистова Эмилия Михайловна, Тозыяковтордыҥ династиязыныҥ адыла адалган Ӱзнезиныҥ текши ӱредӱлӱ школыныҥ алтай тил ле литератураныҥ ӱредӱчизи.

Конкурстыҥ туружаачыларыныҥ ижин баалап, ончо јанынаҥ теҥ-тай ширтеп, ӱредӱчилер бойыныҥ ижин једимдӱ ле бийик кеминде кӧргӱзерине јарамыкту айалга тӧзӧп иштеген жюриниҥ турчылары ижин база темдектейдис.

Конкурстыҥ туружаачылары «Портфолио баалары», «Таныштыру», «Методикалык биригӱ», «Ачык урок ло оны ылгаары», «Мастер-класс» «Ачык эрмек-куучын» ченелтелер ӧткӧн. Анайып, эҥ артык, jаркынду, ченемели тереҥ, кöгÿс байлыгы бай туружаачыларды башка-башка номинациялардыҥ јеҥӱчилдери кайралдатты: Аратина Сынару Васильевна ‒ «Лучшая визитная карточка»; Мендешева Уажнай Ивановна ‒ «Лучший мастер-класс»; Самтакова Айна Вячеславовна ‒ «Учитель-методист»; Тагызова Рената Александровна ‒ «Учитель-мастер»; Теркишева Айсура Кимовна ‒ «За методическую эрудицию»; Тунтешева Олеся Николаевна ‒ «Учитель – хранитель традиций»; Феоктистова Эмилия Михайловна ‒ «Учитель-новатор».

Ончо конкурстыҥ бӧлӱктерин једимдӱ ӧдӱп, кызу тартыжуда јеҥӱчил болуп Кырлык jурттыҥ орто ÿредÿлу школы баштамы класстардын ÿредÿчизи Айсура Кимовна Теркишева чыкты. Јеҥӱчилге Горно-Алтайск калада ӧткӧн Алтай Республиканыҥ педагогикалык устарыныҥ неделезиниҥ кӧдӱријилӱ јабылтазында «Алтай тилдиҥ ле литератураныҥ ӱредӱчизи-2020» деп кӱндӱлӱ кайрал табыштырылды. 2-чи јерде Самтакова Айна Вячеславовна, Теленит-Сортогой jурттыҥ орто ÿредÿлÿ школыныҥ баштамы класстардыҥ ӱредӱчизи; 3-чи јерде Феоктистова Эмилия Михайловна, Тозыяковтордыҥ династиязыныҥ адыла адалган Ӱзнезиныҥ текши ӱредӱлӱ школыныҥ алтай тил ле литератураныҥ ӱредӱчизи.

Бу кӧрӱ-маргаанды белетеп ӧткӱреринде Шабалин аймактыҥ ӱредӱ бӧлӱгине јаан быйанысты јетиредис, анчада ла Роза Васильевна Сулинага, ӱредӱ бӧлӱгиниҥ метод.кыбыныҥ башкараачызына, Шыргайтыныҥ школыныҥ директорына Эльвира Ильинична Тужаловага, Шыргайтыныҥ школыныҥ ӧмӧлигине, јурт јеезезине быйанысты јетиредис.