Ӱлӱрген айдыҥ 16-чы кӱнинде ÿредÿ ишчилериниҥ билгирин бийиктедер курстардыҥ ӧйинде алтай тил ле литератураныҥ ӱредӱчилериниҥ таҥынаҥ ижин кӧрӱ-выставказы ӧткӧн. Ӱредӱчилер - А. В. Курдяпова (Кош-Агаш јурттыҥ В. И. Чаптыновтыҥ адыла адалган орто ӱредӱлӱ школыныҥ алтай тил ле литератураныҥ ӱредӱчизи), А. Г. Усольцева (Теленгит-Сортогой јурттыҥ орто ӱредӱлӱ школыныҥ алтай тил ле литератураныҥ ӱредӱчизи), О. Н. Саланханова (Кӧкӧрӱ јурттыҥ орто ӱредӱлӱ школыныҥ алтай тил ле литератураныҥ ӱредӱчизи) бойыныҥ эрчимдӱ педагогикалык ижиниҥ јажыттарын ачып, јуулган ӱредӱчилерге ижиниҥ аҥылузын куучындагылады.

     Кӧрӱ-выставкада ӱредӱчилер Л. В. Кокышевтиҥ јӱрӱми ле чӱмделгезине учурлай ӧткӱрген эҥ талдама урокторы, класста эмес иш ӧткӱрерине керектӱ материалдар аайынча јартамал бергиледи. Јуулган ӱредӱчилер јилбиркеп, ӱредӱчилерге сурактарыла баштанып, куучын улалды.

      Кӧрӱ-выставканыҥ учында О. Н. Саланханова ӱредӱчилерге бойыныҥ чӱмдеген ӱлгерлерин кычырды. Јуулган ӱредӱчилер анайда ок бар материалдарды бойына тузалу эдип, электрон бӱдӱмдӱзин алып алганы јарамыкту болды.