Алтай Республиканыҥ ӱредӱ ишчилериниҥ билгирин бийиктедер ле такып ӱредӱ берер институтта  ченемелдӱ, јайаан иштӱ ӱредӱчилеристиҥ педагогикалык ижиниҥ таҥынаҥ кӧрӱ-выставказын кӧргӱзери јаҥжыгып калган. Кочкор айдыҥ 6-чы кӱнинде алтай тил ле литератураныҥ ӱредӱчилерине Улаганныҥ орто ӱредӱлӱ школында узак ӧйдиҥ туркунына иштеп келген Наталья Николаевна Санинаныҥ «Калыгым энчизи – јаш ӱйеге» деп педагогикалык таҥынаҥ кӧрӱ выставказы  ачылды.

Наталья Николаевна ченемелдӱ, јайаан иштӱ ӱредӱчилердиҥ бирӱзи. Школдо иштегениле коштой бӱгӱн ол Алтай Республиканыҥ алтай тил ле литературыныҥ ӱредӱчилериниҥ ассоциация биригӱзиниҥ башкараачызы болуп јат.

Педагогикалык кӧрӱ выставкада Наталья Николаевна бойыныҥ ченемели керегинде куучындап, кӧргӱзилген иштерди ӧткӱргенин, тургузылган амадуларга канайда јеткенин чокымдап јартаган. Н.Н. Санинаныҥ бу выставкада иштери ӱч бӧлӱктеҥ турган – ол автор эмезе соавтор болуп турган бичиктер, јуунтыларда кепке базылган бичиктер ле журналдар ла газеттерде бичигени.

Н.Н. Санинаныҥ ижинде эҥ јаан ла каруулу ижи – ол ӱредӱ бичиктердиҥ тургузаачыларыныҥ бирӱзи болуп јат.  Анайып, ол 10-чы класстыҥ «Алтай литература» деп ӱредӱ бичиктиҥ, бу ок бичикке белетелген методикалык ууламјылардыҥ, 6-чы класстыҥ «Алтай тил» ӱредӱ бичиктиҥ авторлорыныҥ тоозында. Оныҥ бойыныҥ темдектегениле, ого сӱрекей јуук ла јӱрегине кару бичиктер бар. Анчада ла ол ӱренчиктериле кожо улу јууныҥ туружаачылары керегинде бедреништӱ ӱлекер иш бӱдӱрип тургускан бичиктерин  аҥылайт.

Кӧрӱ выставкада республиканыҥ аймактарынаҥ келген алтай тилдиҥ ле литератураныҥ ӱредӱчилери, ӱредӱ ишчилериниҥ билгирин бийиктедер институттыҥ ишчилери болгон. Мындый кӧрӱ туштажулар ӱредӱчилерге кӧп билгир берип, ол ок ӧйдӧ ӱредӱчиниҥ ижиниҥ учурын кӧдӱрип јат.