Јаҥар айдыҥ 1 кӱнинде Алтай Республиканыҥ ÿредÿ ишчилериниҥ билгирин бийиктедер ле такып профессионал ÿредÿ берер институтта алтай тил ле литератураныҥ ӱредӱчилериниҥ биригӱзиниҥ јууны ӧтти. Јуунды ректордыҥ ордынчызы болуп иштеп турган Екатерина Дмитриевна Чандыева ачып, Москва калада Тӧрӧл тилдиҥ ӱредӱчилери ортодо Текшироссиялык мастер-класстыҥ јеҥӱчили болуп чыккан Баграшева Юлия Карандашевнаны уткыды. Анайып, биригӱниҥ јуунында ӱредӱчилер Республикан классический лицейдиҥ алтай тил ле литератураныҥ ӱредӱчизиле Юлия Карандашевнала туштажып, куучынын уккан. Онойдо ок бу конкурста туружып, јеҥӱчил болгон Чербыкова Ырыс Чолтоевнаныҥ, Яконур јурттыҥ орто ӱредӱлӱ школыныҥ баштамы класстардыҥ ӱредӱчизиниҥ ижи аайынча јол-јорыкка кожо јӱрген Татьяна Армисовна јетирӱ этти. Ӱредӱчилер бу јаан једимдерге јеткенин куучындап, конкурска канайда белетенери керегинде куучындагандар.
Методика јанынаҥ куучынды каланыҥ 7 таҥмалу школыныҥ ӱредӱчизи Юлия Альчиновна Мундукина уулалтып, ӱренчиктерге керектӱ иштеер тетрадьтар кӧргӱскен. Алтай тилле 5-11 класстардыҥ ӱренчиктерине белетелген бу тетрадьтарды ӱредӱчилер сӱрекей јилбиркеп кӧрдилер.
Кан-Оозыныҥ орто ӱредӱлӱ школыныҥ алтай тил ле литератураныҥ ӱредӱчизи Кыдрашева Эмилия Сергеевна литературный краеведениеле ӱренчиктерди НОУ-га белетеери аайынча ижи керегинде куучындап, ӱредӱчилерле бойыныҥ ченемелиле ӱлешти.
Бӱгӱнги кӱнде алтай тил ле литератураныҥ ӱредӱчилериниҥ частар јанынаҥ ӧҥзӱре сурактарын Шебалинниҥ орто ӱредӱлӱ школыныҥ ӱредӱчизи Шилинова Татьяна Михайловна кӧдӱрди. Бу суракка карууны Самаева Марина Анатольевна берип, јетпес частарды кайдаҥ алар арга барын јартаган. Ээчий куучынды Амырова Жанна Иостыновна улалтып, учебный пландардыҥ бӱдӱмдери, алтай тилле колбулу ӧткӱрилген мониторинг шиҥжӱ иштер керегинде јетирӱ эткен.
Мында ӱредӱчилердиҥ алдында тургузылган сурактар аайынча куучын ӧткӱрилип, шӱӱлтелер чыгарылган. Ол тоодо 2016 јылда ӧткӱрилген иштерди кӧрӱп, келер јылда бӱдӱретен иштерди темдектеери аайынча куучын ӧткӱрилген.
Биригӱниҥ јуунында республиканыҥ башка-башка школдорынаҥ текши тоозыла 25 ӱредӱчи турушкан.
